Bashkia Kavajë përfaqëson një prej bashkive me komunitete lokale më aktive në qarkun Tiranë. Takimet e fokusuara me grupet e interesit dhe ato komunitare, si dhe përfaqësues të bashkisë, konfirmuan eksperiencën e pasur që kjo bashki ka, si dhe potencialët e problematikat ende të shumta vendore që janë krijuar me ndarjen e re territoriale. Një rol specifik në politikat lokale kanë edhe komunitetet rinore, të cilat janë përfituese direkte të politikave sociale dhe shërbimeve publike, ashtu edhe zgjedhës me potencial për vendimmarrjet lokale.
Në funksion të informimit më të mirë të komunitetit rinor, por edhe të njohjes së këndvështrimit të tyre mbi qeverisjen vendore dhe debatin mbi hapësirat e mundshme të angazhimit për një qeverisje lokale sa më përfaqësuese dhe transparente, stafi i ISP ishte në shkollën profesionale “26 marsi” në Kavajë. Të rinjtë diskutuan me ekspertët tanë Prof. Ervin Karamuço dhe Laurent Ymet mbi bilancin e deritanishëm të vlerësimit të treguesve të transparencës, llogaridhënies dhe konsultimit publik në bashkinë Kavajë, – bazuar në monitorimin e kryesor nga ISP, si dhe mbi problematikat në këto drejtime në të ardhmen. Po ashtu, të rinjtë diskutuan edhe mbi hapësirat që ata kanë për të qenë më aktiv dhe më pjesëmarrës në të gjithë problematikat dhe mekanizmat vendimmarrës në qeverisjen vendore, si dhe mbi problemet sociale me të cilat ata ndeshen.
Aktiviteti u bë në kuadër të projektit “Bashkitë e qarkut Tiranë: transparenca, qeverisja qytetare dhe llogaridhënia” mbështetur nga Lëviz Albania. Aktivitete të njëjta janë zhvilluar në secilën bashki të qarkut Tiranë dhe do të vijojnë edhe në nivele të tjera të grupeve komunitare.
