Shitblerja e votës është një nga krimet me ndikim të madh në cilësinë e demokracisë dhe të shtetit të së drejtës, një nga kritikat kryesore lidhur me proceset tona zgjedhore dhe një nga rastet që kërkojnë hetime profesionale, reagim publik dhe koalicion të vullnetit të mirë për sensibilizim, parandalim dhe dënim të çdo forme të ushtrimit të paligjshëm mbi lirinë e votës.
Detyrimi ligjor
Legjislacioni zgjedhor dhe penal ndalon shitblerjen e votës dhe çdo formë tjetër të tjetërsimit të votës përmes shkëmbimit me mall, me ndere, me premtime informale, me vende pune dhe forma të tjera abuzimi.
Problemi
Disa kandidatë për deputetë dhe subjekte zgjedhore, media dhe organizate civile kanë deklaruar publikisht të dhëna specifike për raste të shitblerjes së votës, si dhe kanë cituar praktika konkrete të deformimit të votës së zgjedhësve.
Zgjidhja
KQZ duhet të regjistrojë çdo denoncim dhe të dhënë të mundshme publike dhe administrative, si dhe ta adresojë në organin e prokurorisë për hetime të mëtejshme ligjore. Kandidatët që kanë bërë denoncime duhet të thirren për të dhënë dëshmi dhe për të nisur procese të thelluara hetimore.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
