Kuvendi i Shqipërisë është përfshirë në konsultime publike lidhur me Reformën Zgjedhore. Ndonëse i vonuar dhe i kontestuar nga pjesë të politikës, procesi përbën një mundësi për të adresuar rekomandimet e ODIHR/OSBE dhe të Komisionit të Venecias, vendimet e Gjykatës Kushtetuese, propozimet nga partitë politike si dhe shoqëria civile.
Nga monitorimi i Institutit të Studimeve Politike (ISP) rezulton se Komisioni i Posaçëm:
Nuk ka siguruar ende konsensus politik dhe bazë të qëndrueshme legjitimiteti
Nuk ka ende një kalendar prioritetesh për Reformën dhe draft propozime konkrete
Nuk ka siguruar ende një sistem konsultimi publik efikas dhe të balancuar
Nuk ka arritur ende të informojë publikun për impaktin e ndryshimeve të pritshme
Nuk ka fituar ende mbështetjen publike për Reformë cilësore dhe funksionale
Reforma elektorale bëhet për qytetarët dhe duhet të respektojë pritshmëritë qytetare. Sondazhet e zhvilluara nga ISP theksojnë mbështetjen e madhe publike të qytetarëve për:
Një sistem zgjedhor sa më përfaqësues, të drejtë dhe llogaridhënës
Përfshirje të votës së diasporës dhe depolitizimin e administrimit zgjedhor
Dekriminalizimin e partive, kandidatëve, fushatës dhe stafeve elektorale
Transparencën financiare të partive, fushatës dhe kandidatëve në zgjedhje
Ndarje të qartë të burimeve shtetërore aktivitetet elektorale
Shqipëria meriton një Reformë Zgjedhore gjithëpërfshirëse, transparente dhe funksionale.
Koha për debat publik dhe rrugëzgjidhje për tematikat kryesore të Reformës Zgjedhore!
Kjo video bëhet në kuadër të projektit “Partneritete të forta për reforma të qëndrueshme – Forcimi i rolit të shoqërisë civile në adresimin e sfidave të zgjedhjeve të lira dhe të drejta”, mbështetur nga Ambasada e Mbretërisë së Vendeve të Ulta përmes programit MATRA. Përmbajtja është përgjegjësi vetëm e Institutit të Studimeve Politike.
