Reforma në drejtësi: bilanci dhe perspektiva. Roli i rrjeteve studentore dhe universitare. Debati mbi aktualitetin, sfidat dhe elementët e reformës. Njohje të institucioneve të reja të drejtësisë dhe funksionit të tyre brenda sistemit të drejtësisë dhe sistemit kushtetues. Ndikimet e reformës dhe format e mekanizmat sesi të rinjtë mund e duhet të përfshihen në proces përmes monitorimit, kontaktit direkt, studimit dhe përgatitjes profesionale.
Të gjitha këto e tema të tjera mbi reformën dhe për reformën u debatuan sot në workshop-in e organizuar nga Instituti i Studimeve Politike dhe Departamentet e Shkencave Juridike dhe Politike në Albanian University në Tiranë. Pjesëmarrës pedagogë, studentë të shkencave juridike dhe politike, si dhe ekspertë të reformës.
Gjatë takimit referuan ekspertët Prof. Afrim Krasniqi dhe Prof. Ervin Karamuço, diskutuan drejtuesit e departamenteve Dr. Dorjana Pano dhe Dr. Ismail Tafani, si dhe u zhvillua debat i hapur me pyetje e komente nga vetë studentët. Shqetësimet e tyre mbi ecurinë e vetingut të thelluar në drejtësi dhe në politikë, mbi pasojat ligjore të individëve të larguar nga vetingu, mbi rolin e Shkollës së Magjistraturës, mbi vonesat në procesin e vetingut, mbi fazën transitore midis organeve të reja e të vjetra të sistemit të drejtësisë dhe situatën e krijuar me Gjykatën Kushtetuese e Gjykatën e Lartë, – ishin disa prej tematikave për të cilat studentët diskutuan dhe pati shkëmbim opinionesh.
Aktiviteti është pjesë përbërëse e paketës së aktiviteteve përfshirëse studentore të Albanian University (AU) dhe të Instituti i Studimeve Politike (ISP) lidhur me projektin “Reforma në drejtësi: me qytetarët dhe për qytetarët. Nga ligjet tek jetësimi praktik. Informim, lobim dhe monitorim” mbështetur nga Fondacioni Shoqëria e Hapur për Shqipërinë (OSFA).
