Zgjedhjet parlamentare zhvillon mbi bazën e dispozitave të Kodit Zgjedhor, i cili ndryshoi dy herë gjatë vitit 2020. Kodi përcakton mbi 80 akte nënligjore që duhen miratuar në afate ligjore për përgatitjen dhe administrimin e procesit zgjedhor. Cilësia dhe standardi i procesit zgjedhor ndërvaren nga cilësia dhe standardet e akteve nënligjore, përfshirë nga miratimi dhe zbatimi i tyre në kohë.
Nga monitorimi i Institutit të Studimeve Politike rezulton se në periudhën 6 shtator 2020 dhe 18 shkurt 2021 nga 49 akte nënligjore të parashikuara në ligj, janë miratuar vetëm 82% e tyre. 9 akte ligjore janë ende të pa miratuara, me vonesë nga 10 në 100 ditë. Aktet e munguara lidhur me materialet propagandistike, me udhëzuesit për zgjedhjet, mbi denoncimet e shkeljeve dhe modelin e fletës së votimit kanë ndikim në cilësinë e administrimit zgjedhor.
Legjislacioni zgjedhor ngarkon disa institucione të tjera në nivel qendror dhe vendor për nxjerrjen e akteve administrative në funksion të jetësimit të ligjit dhe plotësimit të kuadrit administrativ për zgjedhjet. Monitorimi tregon se ka një sistem reagimi të njëjtë nga të gjitha institucionet. Jetësimi i akteve në afate dhe respektimi i përgjegjësive nga institucionet mbetet sfidë dhe prioritet në periudhën në vijim të procesit zgjedhor.
Instituti i Studimeve Politike (ISP) është duke monitoruar KQZ dhe fushatën elektorale, si pjesë të angazhimit në projektin “Monitoring the 2021 Parliamentary Elections in Albania” mbështetur financiarisht nga qeveria e Mbretërisë së Bashkuar përmes ambasadës britanike në Tiranë.
